Lieber Opa, du woasch fia mi immer a Fels - anmutig, oana der fest am Boden steht, den nix erschüttern kann. Natürlich hab i - vor allem in die letzten zwoa Joa - gmerkt, dass es Wasser über die Joa a an dir gezehrt hat und trotzdem wars wia so oft im Leben: i hab ma dacht mia ham no mehr Zeit. Umso mehr tuats ma load, dass is nimma gschafft hab da in Alexander persönlich vorzstelln und du nur Fotos gsegn hasch. I bin ma nit vieler Dinge sicher, aber i woas oans: du hattesch ihn lieb ghabt. Mia ham ins zwoa nit imma gleich guat verstanden, aber in insre besseren Zeiten hab i imma probiert da zu zoagn, dass i di trotz allem gern han. Vielleicht isch ja a bissl was davon ankemmen - i hoffats sehr. I erinner mi jednfalls gern zrug an insre gemeinsame Zeit bei da Musig, wo ma nebeneinander miteinander gspielt ham - des war schian. A an meine zwoa Sponsionen denk i gern, ma hat gmerkt, dass da stolz auf mi woasch, des hat ma viel bedeit. Du woasch koana der seine Gefühle jemandem gegenüber nach außen tragn hat und doch kann i mi an zwoa Umarmungen erinnern wia heit: oane bei ins im Wohnzimmer in Seefeld, kurz nachdem inser Katzl da Moritz gstorbn isch, du hasch dei Nationaltracht anghabt und hasch meim damals no so jungen Ich erklärt wia du mit deiner Trauer umgangen bisch und dass es ma irgendwann wieder besser gian weat… und oane vor da Garage draußen, wia i dahoam auszogn bin, da hasch ma viel Glück gwunschn und vielleicht woa a a bissl Wehmut dabei, dass mi iaz nimma jedn Tag sigsch. Sie warn sehr rar und decht, oder vielleicht grad deswegn, hab i se in mei Herzl eingraviert. Vor ziemlich genau am Joa sein da Stefan und i bei dir in da Kuchl ghockt und du hasch ins a alts Fotoalbum zoag - vo dir, wo no jung woasch, vo der Zeit wo die Oma kennenglernt hasch.. und a wenns ins nit gsag hättesch, ma hat da angmerkt, dass se da fest ogeht, dass es da allaweil no schiach tuat, dass se so fria gian hat miasn. Und so brennt in mir momentan nur oans: Hoffnung. Die Hoffnung, dass es danach was gib, die Hoffnung, dass guat ankemmen und jetzt wieda bei da Oma bisch, die Hoffnung, dass ma ins in da Ewigkeit alle wiedersegn und dort als Familie nei anfangen kennen. Iaz bisch du a a Sterndl am Himmel… und sobald ers versteht wea i mitm Alexander in die Nacht auischaugn und iam zoagn wo er Uroma und Uropa finden kann und iam sagn, dass es vo dort aus auf ihn,... auf ins alle aufpassts. Pfiat di, Opa - mia segn ins dann dort. Neli

L Monde und Jahre vergehen,aber ein schöner Moment leuchtet das Leben hindurch Von: Franz Grillparzer

Lieber Karl.....Die Erinnerung ist ein Fenster durch das ich DICH sehen kann, wann immer ich will Deine Martha